السوريين يلي برا كترو! مشروع كتير صغير لبكرة !

بس مشان شي مصمم خلاق و حباب يفهم علينا courtesy: http://media.crothall.com/global/gallery/img/2011-12_synergy.jpg

بس مشان شي مصمم خلاق و حباب يفهم علينا
courtesy: http://media.crothall.com/global/gallery/img/2011-12_synergy.jpg

يا جماعة تفرقوا السوريين . كل حدا صار ببلد. فينا نضل نندوب حظنا و ننتظر ثم ننتظر ثم ننتظر إلى أن ينشق القمر ويهطل المطر و يخرج من باطن الأرض برعم صغير يحمل في رأسه المدبب مركبة فضائية تعيدنا إلى الومفورت زون تبعنا.

و في احتمال تاني: نتطلع عالوضع الراهن و نتصرف ع أساسو (بلا ما نقبل فيه). هالمشروع جزء من سلسلة شغل . متكاملة عم يعملوها كتير ناس هون و هون و هون و هون ….

اذا ما في تكافل .. اذا ما في توحيد رؤيا بكون في بعثرة بالجهود. و أساساً الموارد المتاحة قليلة.

من هالمنطلق في فكرة بسيطة جداً عملنا تجربة عليها و دغري كان في تجاوب . ليش؟ لأنو في حاجة. في فراغ بدو تعباية ( هي غير تبع أيزنهور) .

المهم: التجربة تستند بشكل اساسي لفكرة بسيطة . حلنا نبطل منيكة و ديئة عين تخباية. يا أخي من يوم يومنا شعبنا بيشتغل ليل نهار ع مبدأ استعينوا على قضاء حوائجكم بالكتمان . ماشي الحال بتصير . من مرة لمرة و حسب الحاجة . بس مو بعز الانتهاك و الفضايح و التشرد و الخراب.

يعني اذا سقف البيت طار . اذا الناس دما صار برا. اذا الغسيل وسخ ولا نضيف ما عاد في مجال لنشرو أصلاً لأنو ما في حبال غسيل و كتير مغيمة . لك كتير.

فالكتمان بهالحالة هو دمار.!!

الفكرة بسيطة استعينوا على قضاء حوائجكم – حوائجكن بالكلام. بالمشاركة .

السوريين بكل محل . في ناس لسا كل يوم عم تطلع و في ناس ملبكة و في ناس بدا شغلات وما عم تعرف توصلها.

الفكرة انو نخلق شبكة تواصل اجتماعي للسوريين هدفها تسهيل معاملاتون و توحيد طاقاتون و عدم اختراع العجلة كل مرة كل مرة. على اعتبار انو الوقت و المال و الاعصاب موارد في حالة ندرة.

جربنا أول اختبار على شغلة بسيطة و هي غرض بسيطة دوا – وراق رسمية – الخ بياخدها الواحد بايدو اذا رايح من بلد لبلد . يعني من الآخر ديليفري؟ مستكبرها ع حالك توصل غراض من ناس ما بتعرفون لناس ما بتعرفون ؟ طيب مو ع أساس الشعب السوري واحد. فإذاً هي خدمة بسيطة بس بتريح كتير. شوفوا الرابط بتفهموا ما أبسطها. هلأ المشكلة انو هي معمولة من أريبو يعني بلا برمجة بلا شي . بس نموذج و مع ذلك في عالم سجلت فيها مباشرةً احتياجاتها.

هي نموذج الشغل ع بند واحد و بسيط جداً 

طيب تخيلو معي اذا وسعنا هالشي . اذا عملنا شغلة كتير حلوة . كل واحد باي بلد بيدخل معلومات أي معلونات نشالله سطر عن الشي يلي بيعرفو بهالبلد. مثلاً: جرب يأسس شركة، اسس شركة، دور ع وظيفة، لقى وظيفة أو ما لقى وظيفة، بدو يعمل مشروع بس مصرياتو ع أدو لك لأ مو ع أدو كتييييييييييييير قلال يا سيدي بس بدو يعمل مشروع و عم يدور ع ناس متلو . يا أخي التجار الكبار بيعدو سنة و تنتين و عشرة و ما بيسألو ع شي . مصريون بالدولار و هنن بسوريا كانو بأغلبون مضاربين مو تجار . مشان هيك ما قدروا يفوتوا بالأسواق يلي فيها تنافس فعلاً. بس في ناس تانية عم تعمل مشاريع لك عم تغير حتى مجالها و عم تنجح هدول بأغلبون شباب . من لما كانوا بسوريا كانوا مكافحين و خلقوا بيزنسيز ناجحة من السكراتش . من صفر الصفر. (تقريباً :) ) . طيب مثال تاني ببلاد حول العالم و حدا أدم لجوء يقول للعالم شو الطريقة . بلد غريب و الواحد عند صلات مع ناس بهالبلد و بلش يترجم شغلات ضرورية بالقانون بهالبلد. كمان يعملها مشاركوة.

هاد كلو بشو بفيد ؟

في ناس رح تقول ايه هاد علك و ما بفدي البلد. و في ناس مخها أنضف تكة بتعرف شو يعني اقتصاديات الحجم . شو يعني كراود فندينغ crowd funding شو يعني : Synergy :

1+1 = 3

في شي اسمو تخفيض النفقات بعدة آليات .

هاد كلو اذا واحد و بيندرج تحت بند الاستثمار الأمثل للموارد المتاحة.

في بنود كتير في أهم شي التماسك التكافل . لازم نشد بعضنا . لازم نطلع من مرض تكسير الأديف. لازم نكمل بعض .

و أهم شي انو هاد كلو رح يساعدنا أوتوماتيكاً و بلا ما نحس بال lobbying و بالاختصاص و النيتوركينغ . هي التجمعات و قوى الضغط و التشبيك كلها مفيدة لسوريا الأرض و الشعب.

هاد كلو بخلي الناس بدل ما تتنافس متل الكلاب . أنا آسف بس هاد أخف تشبيه ممكن. على مصاري الغرب انها تخلق شي مشترك . و تقدمو مع بعضها و تأنجز أكتر.

رح قلكون شي . كتاااااااااااااااااااااااااااار عم يدورو هلأ ع شغل . صح؟

و البلد محتاااااااااااااااااااااااااااااااااااااجة لشغل .. صح ؟ بسسسسس ؟ بس مو هلأ دغري يمكن

اذاً شو المشكلة؟ المشكلة هي الفارق الزمني. بين طلب العمل و عرض العمل. في مسافة زمنية.

شو الحل؟ 

الحل من جزئين:

الأول مو شغلة الكل ولا بهم الكل يمكن و هو تقليص هي الفترة ما أمكن . و هاد شي الجزء التانيمن الجواب بساعد فيه بس مو كافي . هاد الو شروطو و ظروفو يلي مو موضوعنا هو نناقشها . بس كمان موجودة أجوبة كتيرة عليها

و الشق التاني من الحل هو انو الناس تقدر تعيش survive بكرامة و راحة نسبية لبين ما يجي وقت العمل. و كيف ؟ هاد من تلت أجزاء:

1- بالمايكرو سمول و السمول انتربراييزس . شركة صغيرة جداً و شركات صغيرة. و هاد الشي ممكن و هون بيجي دور الابداع بشكل كبير و يعول عليه بشكل أساسي لاختراع خدمات و ربما سلع خلاقة

2- كراود فندينغ . crowd funding. تمويل تجميعي . هي آليات لاجتذاب مبالغ غاية في الصغر من عدد كبير من الناس لعمل مشاريع . طبعاً أصحاب رؤوس الأموال ما وافقوا على دعم بسسسسسسسس المنصة يلي ممكن تيسر للعالم عمل هالشي . يعني كأنو قلنالون بس ساعدونا بحق الصنارة قام بنفس طريقة النظام قالوا: لا لا لا منجبلكون سمك خلص شو بدكون انتو بالصيد!! نفس آليات التحكم و مسك الخيوط من شيخ النفط يلي بيفتح شركة للأنظمة الديكتاتورية لكتير دول و مؤسسات مانحة. . ما علينا عمرينون . المهم الكونسبت موجود و ليكنا عم نعرض هالطريقة .

3- و هو الأهم التكافل المالي . المساهمة. الاقتصادات الضخمة كلها ما نبنت ع شركات العائلة بل على شركات المساهمة. الممكن جداً هلأ انو نخلق هالمنصة يلي كنا فوق فوق عم نحكي عنها و بالتالي الناس يلي عندها مشاريع متشابهة بتتعاون لعمل هالمشاريع و يا أخي هي مو زواج و بدك شريك واحد! خليك واحد من 100 وين المشكلة ! كونوا فريق من مية شو بيصير ! بقل دخلك ! بطل جشع ! بتاكول.

هي الورقة فيا كذا فكرة بس كلون بصبوا بخانة وحدة . بدنا منصة لتجميع أعمال و طاقات السوريين لتيسير أعمالون و معاملاتون . محامي هون – دكتور هنيك – موسيقي – صحفي – رجل أعمال – فنان – ناشر – صيدلاني – مصمم – مهندس – الخ . و بالنهاية منكون كأنو كبرنا دويرة السوريين . بدل ما كانت لدويرة بس بسوريا صارت حولين سوريا :( يمكن بتزعل شوي الصورة بس كمان فيا أمل) .. الأمل انو ما نضل ننتظر . ما نضل بمعترين . خلينا نمسك ايدين بعض و من بلد لبلد لبلد صدقوني صدقوني هيك منوصل.

 المطلوب: اذا بتعرفواشي مبرمج أو مبرمجة سوريين محترمين و نضاف و بدون يساعدوا و يشتغلوا كفريق عمل لانجاز هي الشبكة . يا ريت تتواصلوا . و اذا حبيتو الفكرة نشروها. شهر مو أكتر المنصة لازم تكون جاهزة . خريطة الموقع جاهزة اذا في مبرمج دغري بيقدر يبلش شغل.

Advertisements

Tags: , , , , , , , ,

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: